“മുത്തശ്ശാ - പറഞ്ഞാ കേൾക്കണം ട്ടൊ”
കുറച്ച് ദിവസങ്ങൾക്ക് മുൻപ് വീട്ടിലെ ഒരു ഗ്രാനൈറ്റ് സ്ലാബിന്റെ അടിയിൽ പെട്ട് കുഞ്ഞുണ്ണിയുടെ വിരലിൽ ഒരു മുറിവുണ്ടായി. കുറച്ച് ദിവസങ്ങൾക്ക് ശേഷം മുത്തശ്ശന്റെ കൂടെ കളിക്കുകയായിരുന്നു കുഞ്ഞുണ്ണി. മുത്തശ്ശൻ അറിയാതെ ആ ഗ്രാനൈറ്റിൽ കാൽ വെച്ചു. അത് കണ്ട കുഞ്ഞുണ്ണി മുത്തശ്ശനോട് -
“മുത്തശ്ശാ, കാൽ മുറിയും. കാൽ എടുക്കൂ.”
അവനെ കളിപ്പിക്കാനായി മുത്തശ്ശൻ കാൽ എടുത്തില്ല.
“മുത്തശ്ശാ... പറഞ്ഞാ കേൾക്കണം ട്ടൊ..കാൽ എടുക്കൂ.”
കുഞ്ഞുണ്ണിയുടെ ഈ വാക്കുകൾ കേട്ട മുത്തശ്ശൻ ചിരിയടക്കാനാവാതെ അവനെ കോരിയെടുത്തു.
മണ്ണാംകട്ട
മണ്ണാംകട്ടയും കരിയിലയും കൂടെ കാശിയ്ക്കു പോയ കഥ നമുക്കൊക്കെ സുപരിചതമാണല്ലോ. ആ കഥ ഞാൻ ഈയിടെ കുഞ്ഞുണ്ണിയ്ക്ക് പറഞ്ഞു കൊടുക്കാൻ ശ്രമിച്ചു. ഞാൻ പറഞ്ഞു തുടങ്ങി
“മണ്ണാംകട്ടയും കരിയിലയും കൂടെ കാശിയ്ക്ക് റ്റാറ്റ പോയി ”
കുഞ്ഞുണ്ണി ഇങ്ങനെ ഏറ്റു പറഞ്ഞു.
“മണ്ണാംകട്ടയും കരിയിലയും കൂടെ റ്റാറ്റ പോയി”
ഞാൻ തുടർന്നു.
“അപ്പോൾ മഴ പെയ്തു.”
ഇത് കേട്ട കുഞ്ഞുണ്ണി -
“മഴ പെയ്തു. മണ്ണാംകട്ട കുട എടുത്തു.”
ഇങ്ങനെ പറഞ്ഞ് ഓടിപ്പോയി. കുട എടുത്താൽ പിന്നെ കഥ തുടരാൻ കഴിയില്ലല്ലോ എന്നോർത്ത് മനസ്സിൽ ചിരിച്ച് ഞാനും അവന്റെ പിറകേ പോയി...
കുഞ്ഞുണ്ണിയുടെ "ചൂച്ചു"
ഒന്ന്
ഒരു ദിവസം, ഞാനും കുഞ്ഞുണ്ണിയും കൂടെ കളിക്കുന്നതിനിടയിൽ വീട്ടിലെ സ്വീകരണമുറിയിൽ മൂത്രം ഒഴിച്ചു. കുഞ്ഞുണ്ണിയുടെ ഭാഷയിൽ പറഞ്ഞാൽ - "ചൂച്ചു" ഒഴിച്ചു.
കളിക്കുന്നതിനിടയിൽ അവന്റെ ശ്രദ്ധ തിരിഞ്ഞപ്പോൾ ഞാൻ വേഗം അത് തുടച്ചു കളഞ്ഞു. കളിയുടെ തിരക്ക് കഴിഞ്ഞപ്പോൾ "ചൂച്ചു" കാണാതെ അവൻ ബഹളം വെക്കാൻ തുടങ്ങി. എന്ത് പറഞ്ഞിട്ടും ബഹളം മാറ്റാൻ അവൻ തയ്യാറായില്ല.
അവനറിയാതെ അവന്റെ "ചൂച്ചു" തുടച്ച് കളയാൻ എനിയ്ക്കെന്ത് അധികാരം ?
അവനെ സമാധാനിപ്പിക്കാൻ, അവനറിയാതെ, അടുത്തിരുന്ന വെള്ളക്കുപ്പിയുടെ അടപ്പിൽ കുറച്ച് വെള്ളം ഞാൻ താഴെ ഒഴിച്ചു.
“ഇതാ കുഞ്ഞുണ്ണിയുടെ "ചൂച്ചു"” - ഞാൻ പറഞ്ഞു.
ഇത് കേട്ട അവൻ ബഹളം നിർത്തി, തുടക്കാനുള്ള തുണിയെടുക്കാനായി അടുക്കളയിലേയ്ക്ക് ഓടിപ്പോയി.
രണ്ട്
ഒരു ദിവസം രാത്രി, ഉറക്കത്തിനിടയിൽ കുഞ്ഞുണ്ണി "ചൂച്ചു" ഒഴിക്കണമെന്നാവശ്യപ്പെട്ടു. ഉറക്കച്ചടവിലുള്ള അവനേയും കൊണ്ട് ഞാൻ ടോയ്ലെറ്റിലേയ്ക്ക് പോയി. യൂറോപ്യൻ ക്ലോസെറ്റിന്റെ മുകളിൽ നിർത്തി, അവനോട് "ചൂച്ചു" ഒഴിച്ചോളാൻ പറഞ്ഞു. അത് കഴിഞ്ഞ ഉടൻ ഞാൻ “ഫ്ലഷ്” ചെയ്തു. അത് കണ്ടതും അവന് ഫ്ലഷ് ചെയ്യണം എന്ന് പറഞ്ഞ് അവൻ കരച്ചിൽ തുടങ്ങി.
“എന്നാൽ കുഞ്ഞുണ്ണീം ചെയ്തോളൂ ” - ഞാൻ പറഞ്ഞു.
“ചൂച്ചു പോയി. ചൂച്ചു കാണാനില്ല” - എന്ന് പറഞ്ഞ കുഞ്ഞുണ്ണിയോട് ഞാൻ വീണ്ടും അവനോട് "ചൂച്ചു" ഒഴിച്ചോളാൻ പറഞ്ഞു. വീണ്ടും ചൂച്ചു ഒഴിക്കാൻ ശ്രമിച്ച കുഞ്ഞുണ്ണി ഇങ്ങനെ പറഞ്ഞു.
”ചൂച്ചു കഴിഞ്ഞു“
ഉറക്കച്ചടവിനിടയിൽ ഇങ്ങനെ പറഞ്ഞ് വീണ്ടും കരയാൻ തുടങ്ങിയ അവനെ മണ്ണാംകട്ടയുടെ കഥ പറഞ്ഞ് ശാന്തനാക്കി. തിരിച്ച് വന്ന് കിടന്ന ഉടൻ അവൻ ഉറങ്ങിപ്പോയി.
ഈ കാര്യം പിറ്റേന്ന് എന്റെ അമ്മയോട് പറഞ്ഞപ്പോൾ അമ്മ ഇങ്ങനെ ചോദിച്ചു.
”നിനക്ക് കുറച്ച് ഒഴിച്ച് കൊടുക്കായിരുന്നില്ലേ അവന് ഫ്ലഷ് ചെയ്യാൻ ?“ :)
പുലിമുരുകൻ
ഈയിടെ എന്റെ ഒരു സുഹൃത്ത് രശ്മിയുടെ വീട്ടിൽ ഞങ്ങൾ പോകാനിടയായി. അവരുടെ വീട്ടിൽ ചുമരിൽ കുറച്ച് വലിയ ഒരു ചിത്രത്തിൽ രണ്ട് പുലികൾ ഉണ്ടായിരുന്നു. എന്റെ മടിയിൽ ഇരുന്നിരുന്ന കുഞ്ഞുണ്ണിയ്ക്ക് ഞാൻ ആ ചിത്രം കാണിച്ചു കൊടുത്തു. അപ്പോൾ അവൻ പറഞ്ഞു.
”ഇപ്പോ മോഹൻലാൽ വരും“
ആ ചിത്രത്തിനടുത്തേയ്ക്ക് ഓടിപ്പോയി അവൻ അത് സശ്രദ്ധം വീക്ഷിച്ചു. തിരിച്ച് എന്റെ അടുത്തേയ്ക്ക് ഓടി വരുന്നതിനിടയിൽ അവൻ പ്രശസ്തമായ ”പുലിമുരുകൻ പോസ്“ ചെയ്ത് എല്ലാവരേയും ചിരിപ്പിച്ചു.
ഒരു സിനിമ രണ്ടര വയസ്സ് മാത്രം പ്രായം ഉള്ള എന്റെ മകനിൽ ചെലുത്തുന്ന സ്വാധീനം എത്ര വലുതാണ് എന്ന സത്യം ഞാൻ അപ്പോഴാണ് ശരിയ്ക്കും മനസ്സിലാക്കിയത്.
No comments:
Post a Comment